ലിയോ പതിന്നാലാമൻ മാർപാപ്പയ്ക്ക് മുന്നിൽ പാട്ടുപാടാനും കീബോർഡ് വായിക്കാനുമുള്ള അവസരം ലഭിച്ചതിന്റെ സന്തോഷത്തിലാണ് ഗായകൻ വിജയ് യേശുദാസും സ്റ്റീഫൻ ദേവസിയും.
ജാതിഭേദം മതദ്വേഷം ഏതുമില്ലാതെ സർവരും, ദൈവസ്നേഹം വർണിച്ചീടാൻ വാക്കുകൾ പോരാ എന്നിങ്ങനെ രണ്ട് മലയാളം ഗാനങ്ങളാണ് സ്റ്റീഫൻ ദേവസിയുടെ ഈണത്തിൽ മാർപാപ്പയ്ക്ക് വേണ്ടി വിജയ് ആലപിച്ചത്.
പരിപാടിയുടെ വിഡിയോ സ്റ്റീഫൻ ദേവസി ഇൻസ്റ്റഗ്രാമിൽ പങ്കുവച്ചു. വത്തിക്കാനിൽ ഒരു മലയാള ഗാനം. വിജയ് യേശുദാസ് അത് മനോഹരമാക്കി എന്ന അടിക്കുറിപ്പോടെയാണ് സ്റ്റീഫൻ വീഡിയോ പങ്കുവച്ചത്. തന്നെ കൂടെകൊണ്ടുപോയതിലുള്ള നന്ദിയും സ്റ്റീഫൻ ദേവസി കുറിപ്പിലൂടെ പങ്കുവച്ചു.
നീതിക്കുവേണ്ടിയുള്ള അന്താരാഷ്ട്രകൂട്ടായ്മയായ ഗിവ് ലൈഫാണ് പാടാൻ അവസരമൊരുക്കിയതെന്ന് സ്റ്റീഫൻ ദേവസി പറഞ്ഞു. അവിടെ മലയാളം പാട്ടുകൾ പാടാൻകഴിഞ്ഞത് അനുഗ്രഹമാണെന്നും അദ്ദേഹം പറഞ്ഞു.
കാൽ നൂറ്റാണ്ടായി സംഗീതരംഗത്തിന് നൽകുന്ന സംഭാവനയ്ക്ക് ഫ്രാൻസിലെ സോബോൺ സർവകലാശാല സ്റ്റീഫന് ഓണററി ഡോക്ടറേറ്റ് നൽകി ആദരിച്ചു.